睇返之前去旅行嘅相，好想介紹一下九州自然動物園，如果去開九州、福岡、熊本嗰邊旅行，真係好值得帶小朋友去玩下！

呢個動物園最正嘅地方就係可以搭叢林巴士Jungle bus入去猛獸區，嗰度有獅子、老虎、大象、黑熊、長頸鹿、羚羊、犀牛、駱駝等等。

⬇餵食野生動物
大家坐喺jungle bus入面可以近距離望到呢啲動物，動物園亦都會提供肉、蔬菜或者乾糧去餵其中嘅一啲動物，大人小朋友就可以坐喺jungle bus入邊，用鐵鉗伸出去餵佢哋！呢個活動真係幾好玩，係一個好唔錯嘅體驗。

⬇抱抱天竺鼠
餐廳附近有一個區域可以抱抱天竺鼠、仲有一個區域可以摸兔仔，Natalie同細佬都勁開心！

動物園入口附近就有水瀨同埋小馬仔。

動物園入面有來自澳洲嘅袋鼠，小朋友可以行入袋鼠園，等佢哋咁樣接觸袋鼠。

動物園入面有餐廳，可以簡單食個飯，補充下體力繼續玩。

講吓啲交通，如果自駕遊，可以揸埋架車入去猛獸區，不過就冇得餵動物了。我哋唔係自駕遊，可以從別府駅嗰度搭巴士過嚟。