媽媽無意中發現灣仔區有間親子餐廳～Baumhaus，有玩樂區同咖啡閣，適逢三日端午節假期，媽媽就帶豬仔包試吓。

一去到，我哋就見到用實木造嘅樹屋，豬仔包第一時間就走上樓梯，諗住玩滑梯。點知唔夠一分鐘，豬仔包就番轉頭問媽媽，滑梯響邊？媽媽就諗，乜唔係行上樓梯就見到嗎？但媽媽上到去，只見繩網仔，之前響相中見的大滑梯不見了。

媽媽最後響樓梯旁邊揾到個滑梯仔，總算叫做有滑梯，心諗冇大滑梯豬仔包肯定好快話走，但媽媽真係太睇少豬仔包，就算冇大滑梯，就算場內大部分只適合幼兒的玩具都難唔到豬仔包。

豬仔包將場內所有嘢自己係咁搬嚟搬去，搬完一大輪就介紹比媽媽知每層有咩玩具可以玩，仲自己打造一個小型playroom，話乖先可以玩。

 

其實Playroom的樹屋是根據幼兒發展而設計，秘密通道和繩網等設計都能滿足小朋友對觸覺的好奇心，所以豬仔包可以成場穿穿插插，走上走落一點也不覺悶。

 

玩咗一輪，就響旁邊的咖啡廳食點輕食充吓電。我哋叫咗兩份kid’s combos，包咗兩杯很細的babyccino，廚師姨姨好好人，將兩杯babyccino變成一杯大嘅，更加似大人嘅咖啡。

食物份量同味道不過不失，豬仔包都食得好開心。一食飽，豬仔包又走番去玩樂區繼續放電。

⬇Menu

唔知係咪warm up咗，豬仔包由唔敢玩韆鞦到可以自己爬上去，仲係咁叫媽媽大大力推添，連之前經過爸爸指導嘅攀爬架都終於可以自己完成。

連埋食嘢，我哋逗留咗兩個半鐘，臨走豬仔包將所有咕𠱸搬出嚟，話要送去推填區。

玩後感：

～Playroom比較適合幼兒玩樂，可能係佢哋有很多0-3歲的課堂提供，估計顧及幼兒安全將大滑梯拆了。

～非學生$120一位小朋友，成人不收費，而且仲沒有限時，想休閑一家人食吓玩吓，都係一個非常好的選擇。