「粒粒皆辛館」係全港首間結合惜食和關愛的實體展館，位於深水埗。媽媽同豬仔包因為在疫情期間參加了惜食堂 Food Angel嘅網上工作坊，所以受到邀請參加活動，本來豬仔包未夠歲數參加（年齡須為4-15歲），但經職員評估後，告知豬仔包合資格參加，咁就開始咗我哋嘅惜食探索之旅。

 

大家簡單認識咗惜食堂嘅工作後，全部人就分兩組進行體驗。我哋首先去到模擬劏房區，了解貧窮人生活環境，除了環境擠迫和惡劣外，原來每天只能食兩餐，兩個麵包、一碗麥皮已經係一整天嘅糧食，聽完講解，個個小朋友都學懂要珍惜食物，一日三餐温飽並非必然。

小朋友化身老人家，進行執紙皮遊戲，體驗貧窮人生活。起初豬仔包非常起勁，但執咗幾轉之後開始感覺攰了，全部小朋友好努力回收一大堆紙皮，原來都只係值好少錢，汽水罐執100個也只值$5，深切感受弱勢社群賺錢不容易。

跟著，我哋去到另一間房睇270度大螢幕電影，原來我哋簡單一個微笑，簡單一句問候已經係對老人家莫大嘅關懷。響活動期間，豬仔包仲飾演伯伯，等大家祝福，場面攪笑，豬仔包應該係最年輕嘅伯伯吧！不過當社工姑娘話比我哋知，原來相比其他亞洲國家，香港係最多廚餘浪費的地方，大家都好失望，我哋真係要努力，不要再浪費。

 

社工姑娘教我哋惜食冷知識，將廚餘大變身、食物擺放方法、食品點睇食用日期等。最深刻係玩咗個小遊戲，其中一個小朋友勝出，問佢願唔願意將奬品同其他小朋友一齊分享，佢大方答應，跟著全場小朋友都變成每人都有小禮物。工作坊透過這樣的方式教小朋友分享真係好好。

 

我哋透過VR虚擬惜食影片感受被遺棄芒果的心情，仲有每人每日廚餘嘅重量，可以嘗試用拉繩方式感受，對媽媽同豬仔包嚟講係一個新體驗。

 

最後係環保蛋殼工作坊，用染咗色嘅蛋殼進行拼貼，製作獨一無二又漂亮嘅畫作。話咁快1.5小時嘅工作坊就完結，豬仔包獲益良多，有趣嘅講解同互動，一點也沒悶場，臨走仲有小禮物同證書添，實在非常推介家長帶小朋友體驗一下。