Kids Plaza Osaka 大阪兒童樂園估唔到會咁多野玩，全館共有5層樓，我哋搭電梯由最頂開始玩，5樓有啲似科學館，好多都係實驗性質既遊戲，對弟弟有啲難，但對哥哥就充滿挑戰性！

館內既大水槽好吸引，要靠四個人既力轉動，令中央既水槽注滿水，水滿就會傾倒，好特別，不過會好攰！

大型泡泡機都好受歡迎，影相效果都好靚呀！

之後就黎到最好玩既4樓喇！小朋友係呢層可以角色扮演唔同既專業人員，每個職業既場景都好像真，令小朋友玩得好投入，而且場內職員會俾小任務，完成到會俾人讚叻叻架！

兩兄弟玩得最耐係小商店街，可以做壽司店、關東煮店、章魚燒店、甜點店既老闆，爸爸媽媽坐係度等食就ok，輕鬆陪玩！仲有警察、郵差，需要值班也需要去派信，唔係亂咁派架，真係需要放到正確既信箱入面。佢哋仲有做工程師，要幫手維修水管，好似幾有板有眼咁喎！

⬇小商店街

⬇郵差

⬇超級市場購物
兩兄弟可以拎住購物籃去shopping，再到收銀處俾錢，俾完錢真係會有張收據列印出嚟，好真實好好玩！

館內貫穿4、5樓既大城堡，係大阪兒童樂園一個大既打卡位，又靚又充滿童真，城堡上仲有各種小遊戲玩，有繩網、攀爬等，要小朋友去尋找。仲有條超長滑梯，哥哥話好刺激好好玩。

兩兄弟異口同聲都話好鍾意呢度，我都覺得好適合小朋友去體驗，可以一邊玩一邊學習，每層樓慢慢發掘探索，好新奇。最重要既係爸爸媽媽唔會覺得攰，又唔使日曬雨淋，又有冷氣，好值得黎玩，真心推介俾大家！

 

地址：〒 530-0002 大阪市北区扇町2-1-7

交通 : 地下鐵堺筋線「扇町」駅2号出口

營業時間：（每周一休館）

星期一至星期六 9:30 – 17:00；假日 9:30 – 19:00