上水假日農場原來有30年歷史，真係歷史悠久，都可能係好多家長嘅童年遊樂場。而我哋去過三次，每次都玩得好開心，設施簡單但勝在好玩，返璞歸真，唔太商業化，感覺好raw。

入場費大小同價$120，日營係由朝早10點開始至下午5點，由朝玩到晚絕對夠嘢玩，必須預先上網預約，等電郵確認有booking reference，入場付現金即可，只開星期六日及公眾假期，所以避無可避，都會多人。

 

我哋今次10:30到達後，人流唔算太多，即時去餵下小動物，裡面有豬、牛、羊、兔仔、龜及倉鼠，小朋友對動物情有獨鍾，餵動物始終係最吸引嘅環節，到3pm仲會放羊比你任餵，$10一扎草可以令你在羊群中變得十分受歡迎，值得值得。

 

最吸引就係佢哋智能遊戲場，1-3pm限時開放，真係香港只此一家，玩意簡單但絕對好玩，坐飛氈滑梯夠快又刺激。當然限時開放難免要排隊等候，都係家長負責排隊，小朋友繼續玩住等，小朋友極喜歡坐飛氈滑梯，可以無限loop，一玩再玩，玩到3pm設施即停，好有效率。

 

農場仲有好多其他簡單又好玩設施，樹屋滑梯、搖搖馬、氹氹轉、人力車⋯⋯好多，總之攞上手就可以玩，好啱去玩足一日。

𥚃面有小食部食公仔麵等士多熱食，仲有新鮮出爐菠蘿包蛋撻，$5一個加杯熱奶茶，歎個下午茶，一樂也。

 

注意農場出入口係單程車路，交通非常混亂及繁忙，要有心理準備走可能會有塞車情況，在場會有工作人員控制，大家盡量配合及耐性等候。

 

網站：http://www.holidayfarm.hk/c/