講下有咩玩先！

釣蝦：一黎到當然釣左蝦先，d蝦大大隻，有我隻手板咁大隻～同全部都係活生生既（如果死左果d，老闆會撈起雪藏住佢），價錢＄50租一支竿（一人一支又得，幾個人輪住用又得），蝦釣左上黎一定要放入網，唔可以掉返入池，＄9一襾，我地釣左8隻，共一斤十襾，即是＄234，加埋＄50租竿合共＄284，就咁睇＄284八隻蝦好似好貴，但我覺得由於佢 #不用入場費、#燒蝦不用額外加錢、彈床同足球免費玩，咁我覺得＄284都ok

彈床（免費）：一食完蝦既就跑去跳彈床，場內唔多人，所以跳得好舒服～講真彈床唔大，不過感覺ok乾淨唔係殘舊！由於放在簷篷下，所以中途落雨都唔驚～

電動車（＄30／15min或＄50／30min）：

推介推介～我覺得呢個價錢好抵，因為在我屋企附近商場玩電動車，$60得10分鐘！有5架車揀，賽道係一個大大既正方形，有3條濶濶既行車線，寬敞唔會迫

釣魚（租竿＄30／1小時，＄100／1日，包1份魚餌）：

釣到的魚獲可買可不買，如果買就不論大小＄100一條，如果唔買就除下嘴裡既鈎直接放返入池就ok，我行過魚池度想睇下d魚，但完全睇唔到裡面有d咩，好神秘，我朋友有釣，佢釣左1個鐘就有3條魚，不過唔大條，大約手板咁上下，所以佢地無買，不過我見在場有1個人釣到1條魚好大條，有兩隻手板咁大！

足球、車仔（免費）：

有個小足球場，係草地既，附近放左幾個唔一樣既波俾大家拎黎玩，仲有d小車仔、馬仔可以騎…

撈金魚（＄30／8網）：

係紙網，對於小朋友黎講好難撈…幾經辛苦我總於撈左1條可以拎去換小禮物啦～吉揀左吹泡泡

 

撈玩具魚（＄30／15min）

我地無玩，因為我屋企都有

投幣小遊戲（＄2／幣）

有夾2個幣公仔機、2個幣籃球機、1個幣彈波子機

小型噴水池（＄80首一小時，之後每多租一小時多減＄10，即第二小時＄70、第二小時＄60…）

我仲見到有2支水槍，職員說如果租左後想玩水槍，都可以拎黎玩，全場只有一個水池，所以想玩就要早d book啦

缺點：1）離開時有點麻煩，call的士call唔到，可能因為去西鐵太近無司機接，所以職員就教我地在正門，行過條小橋，轉右繼續向前行幾分鐘就會見到小巴站，咁就可以搭601P去錦上路西鐵站或601去元朗西鐵站～

2）我覺得洗手間既清潔程度有改善既空間

總結：講真，佢唔係超多野玩果d農莊，但我覺得釣蝦係幾得意幾好玩，小朋友會幾鐘意～同唔多人，所以我覺得好好呀～同我覺得呢個農莊有heart，有唔好既地方會改善，因為我今日係第二次黎，上次黎係一個半月前，果時個彈床係peppa pig圖案，好殘好舊，當時諗住免費唔好太多要求，今次黎到發現轉左喜洋洋圖案！換左新彈床！！有驚喜～仲有上次黎見有人投訴釣既魚得手指咁細條唔滿意，今日見到d魚大部分都有手板咁大條，甚至有1個人釣到有2隻手板咁大，所以我覺得呢度幾好

而家做緊BBQ優惠：

星期一至五：成人＄120，小童＄110

星期六日及公眾假期：成人＄158，小童＄118

（110cm以下不用收費）另收開爐費＄50

我見呢度仲有露營服務，＄138一位（週末加＄20），原來而家露營都可以有冷氣租，只需加＄100就可以用一晚！

前往方法：我在錦上路西鐵站搭的士約＄30入去，搭車既沿途間中會見到有紅色banner掛在旁邊圍欄寫住農莊個名，所以我覺得唔難搵，亦可參考下佢網址

預約及查詢電話：6273－0538

開放時間：

星期一至四 10am-11pm

星期五六日及假期 10am-凌晨1am