輕輕鬆鬆接觸大自然！

你細個學校旅行/Field trip 一定去過獅子會自然教育中心，真係好多年冇去過喇！一於去行吓先! 趁著周末來到這裏，悠悠閒閒周圍走走，沒有定下什麼行程，純粹東走走、西走走，讓酒粒B自由發揮，與其是留在家中看書了解自然生物，不如直接去大自然走走，讓小孩自己發掘吧！趁着疫情好返少少，我同酒粒B就好好咁出去走走。

 

始終酒粒B仲係好細個，但係又想帶佢去接觸一下大自然，最好就是周圍人不太多，遠離繁囂，出去唞下氣。由彩虹乘車到西貢北港站最快半小時，步行大概10至15分鐘，就可以到達位於西貢北港站附近嘅獅子會自然教育中心，今次我哋冇帶BB車，就算用孭帶孭住酒粒B，都可以輕輕鬆鬆到達。

獅子會自然教育中心向來是喜愛大自然生態的朋友的必去，亦是適合一家大小親子去的好地方，裏面有小荷花池、蝴蝶谷、昆蟲館、小果園 、趣味植物、中草藥園等，仲有一系列嘅展館，例如魚館、地質公園館等。還有條蕉坑自然教育徑，好腳骨力嘅大人朋友可以去行吓山，這裡是一個動靜皆宜的郊遊好去處，而且仲要免費入場添！這裡亦都好適合帶你的狗狗去放風、散步，因為周圍都係大片嘅草地。我哋當日沿途都遇到好多主人帶小狗嚟散步。

還在學行階段的酒粒B東走走西走走，已經好開心，小朋友的開心其實好簡單單純，坐下涼亭、抖抖乘涼，就過了一個下午。裏面嘅展館我就無全部行晒喇！因為今次過嚟都係比較隨意。

聰鳴茶座

行到累了，可以去中心內的「聰鳴茶座」吃個tea，過一個悠閒下午。希望大家多多支持聰鳴茶座，這裏是一間會聘用聽障人士嘅茶座，食物質素都唔差㗎！價錢亦都合理！行到攰入到黎坐吓真係超級好！

但要注意佢哋嘅開放和關門時間，當日係營業到下午4:30，裏面都有飲品同埋雪糕售賣。

雙層豬柳蛋漢堡，配薯條跟汽水 $72

美式牛肉芝士漢堡，配薯條跟汽水 $98

另外獅子會自然教育中心都係一個適合野餐的好地方，中心內好多地方都有涼亭或可供野餐嘅枱櫈。

大自然生態

我們就剛巧見到一大群蝴蝶圍住一棵植物上面，好壯觀呀！目測應該都有20至30隻蝴蝶那麼多，Kaka mama 真的從未試過一次過見到那麼多蝴蝶在我面前出現，Kaka mama 一向都好鍾意蝴蝶，不知道大家會不會同樣在這裏遇見很多蝴蝶呢？請記緊提醒你的小朋友不要騷擾那些蝴蝶，這樣會擾亂自然生態呀！靜靜地觀察就可以。另外中心裏面有昆蟲館同埋蝴蝶谷可供參觀㗎。

 

交通方面

乘搭公共交通工具，於北港巴士站下車，過對面馬路，然後步行前往中心(大概5至10分鐘）

92號巴士來往港鐵鑽石山站－西貢

1A號專線小巴來往港鐵彩虹站－西貢

還有部份去西貢嘅巴士或小巴都經過北港站，詳情可以上返官網，它們有提供詳細交通路線。

 

離開的時候，酒粒B已經睡着了。

我們選擇直接由北港巴士站乘小巴離開回去彩虹地鐵站(沒有回去西貢市中心)

亦可自行駕車前往，亦有停車場提供

提提大家由於北港巴士站是來往西貢至市區的中途站，所以是比較難有位置上小巴或巴士，大多在總站已經上滿客，當日由於剛有一架小巴沒有在總站埋站上客，所以我們好好彩上到這一架小巴。有需要時可能需要先乘車去西貢市中心，然後在總站再轉車就會比較容易上到車。

記緊帶備適合幼兒用蚊怕水&防曬，定時補搽防曬，以免曬傷，亦要定時飲水補充水份，慎防中暑。

如果同剛識行的幼兒同行，地下始終係石路亦都有草地、碎石，小心睇住幼兒以免他們跌親。

亦都請緊記時刻洗手保持衛生，戴口罩，繼續抗疫保持社交距離。

中心內沒有育嬰室但有洗手間，要留意番洗手間開放時間。

 

多年冇來過這個地方，再來就一次愛上，這裏真的環境清幽，好值得遊覽，就好似城市裏面一個後花園，下次一定會再嚟，然後再深入去參觀每一個展館，或者下次帶埋食物來野餐都係一個好不錯的親子郊遊好去處。秋天再嚟呢度，天氣涼返少少，相信這𥚃又會有另外一番的風景。

>> 西貢獅子會自然教育中心 (免費入場)

地址: 西貢蕉坑

開放時間:�展覽館及洗手間等設施(星期一、三至日及公眾假期 9:30am 至4:30pm 星期二休館)

園內範圍保持開放

詳情請自行到官方網站查詢，一切以他們公布為準

網址:https://www.afcd.gov.hk/…/cou_lea/cou_lea_ven/lions.html

園內地圖可供參考:

#西貢獅子會自然教育中心 #親子好去處 #城市後花園 #免費好去處 #週末好去處 #狗狗散步 #petfriendly #蝴蝶 #自然生態 #自然教育 #幼兒好去處