好耐都冇去過香港海洋公園，適逢聖誕活動開始，一於帶豬仔包去玩番日。海洋公園響今個冬天變身成夢幻嘅芬蘭聖誕小鎮，有多個聖誕活動，包括：
⬇歐陸聖誕市集
聖誕市集真係好多攤檔，共有超過35個品牌輪流進駐。有聖誕甜品、糖果、小手作、聖誕飾品、洋酒等等，種類繁多。
⬇閃亮聖誕派對
幻彩光效巨型聖誕樹
⬇飄雪
遠遠見到間聖誕屋豬仔包已經好興奮，行前少少仲見到有飄雪添，真係未開始玩已經感受到濃厚嘅聖誕氣氛。
⬇遊寄聖誕
售票處裡面仲有聖誕卡派發，外面有枱同筆提供，但枱真係太高，豬仔包連枱面都唔夠高睇，所以我哋就去咗旁邊嘅休息區，坐低慢慢寫，寫完就可以放入「遊寄聖誕」郵箱，會免費幫我哋寄比聖誕老人架。
⬇約會聖誕老人
指定日子可與聖誕老人見面。突然聽到鈴聲，原來聖誕老人出現呀，豬仔包即刻衝去排隊同聖誕老人合照。聖誕老人唔係企定定架，影一陣就會周圍走，去不同地點影相，豬仔包咁岩係同恐龍仔影，非常開心。
⬇海洋奇觀餵飼魚類
我哋就去「海洋奇觀」諗住睇餵飼魚類示範，無意中發現原來可以購票親手餵飼珊瑚魚，實在太驚喜啦，飼料$80一份，每場都有人數限制，我哋好好彩仲未滿額。響餵飼之前，豬仔包要先消毒雙手，跟著就可以去到餵飼區，一嘗餵飼樂趣。工作人員比我哋嘅飼料係南極磷蝦，只有4球，所以豬仔包好快已經餵完。
⬇聖誕SING樂匯 – 本地不同團體豐富表演
表演嘅係音樂學校嘅小朋友，大唱聖誕歌，豬仔包全部都識，可以跟著一齊唱，所以睇得特別投入！
⬇好『芬』聖誕小鎮
「聖誕小鎮」入口，媽媽問工作人員先知，原來係入聖誕屋嘅入口嚟㗎，媽媽同豬仔包當然即刻入去參觀一下啦！入到裡面，見到「夢幻糖果屋」、「聖誕薑餅工房」同「聖誕老人禮物基地」，打卡真係超靚！
⬇夢幻糖果屋
⬇聖誕薑餅工房
⬇聖誕老人禮物基地
超級巨型熊Bear Bear、砌積木、扭蛋攞糖果，全部豬仔包都好鍾意，玩到唔捨得走！
⬇冬雪世界
「冬雪世界」有真雪滑梯，但要夠120cm高先玩得，豬仔包有排都未到冇得玩，但就可以響雪地玩雪，超過3歲就要購票進入，$40 一個人，大小同價。入去前冬雪世界工作人員會派發雪爪比我哋，著好就可以入去啦。
⬇玩雪
場內有膠桶仔比我哋裝雪，但因為冇鏟仔提供，豬仔包又唔識利用個桶去鏟雪，變咗要用手，真係凍到手都彊晒，不過就玩得好開心！
⬇真雪滑梯
由於係分批玩，所以玩咗大約10-15分就清場。本來玩完雪，可以排隊玩真雪滑梯，不過由於豬仔包唔夠高，媽媽又唔想留低豬仔包自己上去玩，所以望吓其他人玩之後，我哋就離開啦。
今次海洋公園之旅，真係好多嘢都未玩，等聖誕假期，一定要帶豬仔包再去多次先得。
《HO HO HO 好「芬」• 好玩 · 好聖誕》
地址：海洋公園海濱樂園廣場
日期：2022年12月11日 至 2023年1月2日
Facebook
Email
WhatsApp
Add a comment