⬇營地房間
唔知大家有冇留意大埔開咗呢個好靚好新淨嘅營地愛丁堡公爵訓練營 ？ 

佢呢度係訓練營，硬件好好，房間好大好靚好新淨。我哋喺疫情期間訂房，夾咗20人以上所以可以早六個月訂房，當時政府有限制每間房嘅人數，我哋當時訂八人房，點先入住嘅時候先發現原來係一間24人嘅大房，小朋友見到咁大間房好興奮！12張碌架床變咗佢哋嘅遊樂場，自創好多遊戲爬上爬落玩，喺房都好開心！

講吓啲活動，策劃今次活動嘅媽媽好好，一早安排好晒活動！營地有各種活動，不過有唔同嘅年齡限制，我哋今次嘅小朋友主要係八歲左右，可以玩到嘅活動都唔算太多。

 

地壺球同芬蘭木棋都係比較靜態嘅活動，大人小朋友可以一齊參與！導師帶活動帶得好好，大家都玩得好投入。

⬇芬蘭木棋
每個活動收費都唔同，可以去官網參考收費。

AR 閃避球係最好玩㗎！一定一定要book! 呢個遊戲好似打機咁樣，不過要郁手郁腳，仲要用啲策略，睇吓點樣贏比賽！小朋友玩得勁開心！

 

除咗俾錢參加嘅活動，場地有草地俾小朋友放電，嗰度有幾間小木屋可以爬上爬落。

成個營地最失望嘅應該係膳食。本身我哋以為營舍會係一枱幾個餸，有肉有菜，白飯任裝咁… 點知呢度係每人一兜，再加一盒紙包飲品，而且冇得選擇。味道中規中矩啦… 感覺頹啲… 可能訓練營就係咁樣～ 食完嘢之後要自己倒食剩嘅嘢、自己擺好餐具，對小朋友來講都係一個好嘅訓練。沖涼、去廁所嘅地方都非常乾淨企理。床鋪、枕頭袋、被袋都係要自己鋪，大人小朋友都要落手做！

 

營地有得泊車，一入一出要俾$100。離開之後可以去旁邊嘅林村行吓。總括來講，呢個營地唔算非常適合小朋友；可能大少少、10零歲以上嘅青少年會好啲。不過！一班小朋友去邊度都開心啦！多謝策劃活動嘅媽媽，下次再玩過！