火子爸帶左我地去華山，當然唔係華山論劍既華山，而係上水果個。

趁天氣好想行下，想有靚view但腳骨力又唔係好夠⋯

今次嘅路線火子爸無介紹錯，爬文睇返，原來華山有香港萬里長城之稱，如果體力充足，可以一次行哂幾座山，不過我哋今次就只係用左大約半個鐘，行到一個開揚位置等睇日落啦！

起點在虎地坳公廁對面嘅斜路，經過車廠一路直上。

大概20分鐘就會見到好高嘅樹，山邊仲有一個肥矮嘅標柱，除咗呢個位置，山上其他位都冇咩樹，優點係景觀開揚，但就會比較曬，之後繼續行，行落一個大斜路，發現兩旁有好多芒草，超級浪漫。

今次路段都算易行，全程石屎路，不過高低起伏多，有啲路都幾斜，記緊要着返合適嘅鞋，同提醒小朋友斜路前要煞掣啊！

 

注意事項

-由於近邊境，行去起點前路段的馬路不時有大貨車經過，行人路比較窄，需要小心；

–華山曾經可以比車輛直上，但現在已顯示車輛不可進入，其實咁樣都安全啲；

–爬文顯示附近有練靶場，出發前最好查閱射擊練習時間；

-同小朋友行山，最好帶返小小零食補給，休息可以食下嘢，不過所有垃圾都記得自己帶走啊