⬇免費參觀導賞團
暑假期間，媽媽約埋豬仔包嘅同學仔一齊去參觀民航處航空教育徑。呢個導賞團活動係免費架，仲可以個人或團體申請都得添。地下展區嘅入口就有大大個香港國際機場嘅鳥瞰圖，導賞員叫小朋友幫手揾我哋嘅所在地，亦介紹咗好多機場設施比我哋認識，之後我哋就開始進入展區度參觀啦！首先，我哋見到民航處總部建築模型，牆上就有好多關於本地航空數據，比我哋知道其實香港國際機場係非常繁忙，不過由於疫情影響，而家只係回復咗3成左右，希望好快會全面復甦，一切回復正常。

再往前行，就見到第一代航空交通管理系統，比我哋知道初時航空交通管制員崗位係有咩設施去安排航班升降。地上嘅跑道亦比我哋認識香港機場其實係有6條跑道架。呢個區域豬仔包比較感興趣，因為有嘢摸吓按吓，唔會只聽講解，仲自己扮飛機響跑道起飛添！

 

 ⬇航空教育徑展區
一入到去就見到一個好大嘅螢幕，經導賞員講解先知道除咗機場飛機嘅升降之外，響香港上空路過嘅飛機，航空交通管制員都需要顧及，要為所有飛機提供安全間距，使空中交通可以保持快速兼有秩序嘅流量。

展館仲有現行空中交通管理系統嘅空管人員工作位置、數碼塔臺設施展示、航空危險品和限制品展示、黑盒同求生工具包展示等，從而了解空管人員的日常工作上的運作。

之後去到「複制乘客艙」，個個小朋友都爭住坐響像真度極高嘅飛機椅上面，一邊坐一邊睇影片。

「觀景廊」可以近距離感受到飛機嘅升降，真係一個絕佳睇飛機嘅地點，豬仔包睇到唔捨得走！

1.5小時嘅導賞旅程好快就過去，導賞員嘅講解對媽媽嚟講係非常吸引，但豬仔包同同學仔就真係冇咁好耐性，所以好多時都係走嚟走去，媽媽覺得導賞比較適合高小以上，或對航空有濃厚興趣嘅小朋友參加，所以等豬仔包大個啲，會再次嚟參觀，應該會有不一樣感受！

 

地址：香港大嶼山 香港國際機場東輝路1號 民航處總部

導賞團預約時段：

星期一至五（公眾假期除外）上午10時 至 11時30分 及 下午2時 至 3時30分

交通：可從東涌鐵路站巴士總站乘搭S1路線巴士到達民航處總部

網址：https://www.cad.gov.hk/chinese/aviation_education_path.html

預約：個人申請者包括申請者在內，每次申請參加人數最多為10人，須在到訪前最少4個工作天致電民航處公共關係組電話預約

電話：2910 6352
費用：全免