豬仔包近期對於「車」嘅嘢都特別有興趣，於是媽媽就帶佢去屏山一間以跑車為主題嘅餐廳朝聖一下。屏山跑車餐廳 Motors cafe雖然響村裡面，但一啲都唔難揾，因為一去到門口已經見到大大架紅色嘅跑車裝飾，豬仔包同媽媽即時心心眼。不過未嚟得切打卡，店員話廚師要休息，叫我哋想食嘢要盡快點餐，所以急急腳衝入去。

入到去，全部都係跑車坐椅，枱下有呔鈴，未坐低豬仔包已經非常興奮。除咗餐桌同餐椅外，餐廳周圍都佈滿關於跑車嘅相片同裝飾，頭頂嘅燈係車軚燈同紅綠燈，非常有特色。

餐廳提供嘅係西餐，媽媽本來想試吓賽車手薄餅，但豬仔包一見到有兒童餐，就唔考慮其他。由於媽媽冇可能一個人食哂成個pizza，所以就點咗店員極力推介嘅美國頂級肉眼扒。

 

兒童餐包括肉醬意粉、薯角、沙律同橙汁，味道不過不失，沒有大驚喜。媽媽覺得兒童餐裡面個沙律應該冇乜小朋友會喜歡，如果變成水果或者啫喱/布甸會吸引好多。豬仔包最後只係食咗薯角同橙汁，就成份兒童餐交咗比媽媽，皆因佢係咁食媽媽點嘅食物。

⬇美國頂級肉眼扒

賣相不俗，配咗餐湯同麵包。餐湯同麵包一樣都是正常水平，但肉眼扒反而有啲驚喜。由於媽媽點嘅時候已打算同豬仔包分享，所以特意叫餐廳整熟少少，估唔到個扒仲好juice，而且味道夠濃，岩哂媽媽。不過豬仔包係咁搶食，媽媽其實只係食咗三分一。

除咗食物，我哋仲點咗杯特飲法拉利草莓乳酸 ，酸酸甜甜幾好味，店員知道豬仔包會飲，仲特意減冰，非常細心。

整個用餐過程非常愉快，媽媽仲聽到旁邊嘅食客話卡邦尼意粉同豬鞍好好味，下次再嚟一定要試吓先。

地址：元朗屏山坑尾村105號地鋪

營業時間：星期一至二，五至日及公眾假期11:30-21:30；星期三，四休息

電話：2662 2162 / 9327 9794 (WhatsApp )