早排係FB見到依個探知館嘅介紹，見到啲懷舊間房、籠屋同埋閣仔嘅介紹覺得幾得意，可以同小小豬上返個常識課，等佢了解多啲房屋變遷，所以就即刻預約嚟行返轉。

一入到探知館最吸睛就一定係板間房、籠屋、閣仔、共用廚房及廁所嘅實境，導賞姨姨介紹大部分展品都係真實嚟，好多都係由佢地重建嘅地區收集返嚟，等我地可以感受舊區嘅實況，了解舊區居民生活係狹小空間，面對衛生及安全嘅苦況。

之後就行返轉互動多媒體展覽區，透過多媒體介紹可以等我地了解市區老化問題、市區重建嘅過程同未來嘅發展等。另外仲有一個互動遊戲，透過小遊行等大小朋友可以了解樓宇石屎維修、天台維修、消防設施等注意事項。

不得不俾個LIKE導賞姨姨，佢全程勁有耐性地為我地講解，又唔怕煩咁回答問題少豬嘅所有問題，所以小小豬都話學到嘢哦！

 

「市區更新探知館」一定要預先網上預約才可以入去參觀，所以有興趣嘅朋友仔要留意啦 ~> https://www.urec.org.hk/urec/about/