【 帶你進入森林探索的奇妙之旅 】
我哋又去Staycations喇！今次同Aidan的契媽媽一家去玩2日一夜，揀左一間超適合小朋友住的酒店，雖然餐飲選擇好少而且偏貴，但小朋友的玩樂設施都多，淨係留係酒店玩已經好滿足！
安妮媽媽講緊既係「迪士尼探索家度假酒店」，成間酒店都好有森林探險feel，一落車已經有度假的愉快心情，好有去旅行的感覺呀！
當日酒店安排左相連房間俾我哋兩家人，勁開心，三個小朋友可以係兩間房周圍走。酒店房有兩張大size的雙人床，非常足夠2大2小一齊訓。
老公生日週，酒店都有送毛巾蛋糕小禮物。另外房間內的迪士尼15週年紀念品係可以拎走架，有靚靚拖鞋、筆記簿、明信片、lotion、梳洗用品盒等，又靚又實用！
我哋check in後就即刻去book游水先，因為每日只可以book一節50分鐘的游水時段，仲有人數限制，先到先得，大家想游水記住早d book呀！
迪士尼探索家度假酒店的玩樂設施真係好多，大堂可以睇米奇卡通片，室外仲有個景觀超靚的大草地，小朋友可以玩吹泡泡，踢波，盡情放電。入住時職員會俾張地圖紙我哋，上面有寫到兩間酒店有咩玩樂設施和時間地點，安排好時間就可以玩好多野喇！ 
小朋友一定要去「海底奇兵小天地」的playhouse啦！有小船造型的滑梯，也有其他遊玩設施，仲有迪士尼卡通片睇。
另外探索家有手工藝班俾小朋友參加，小手工創作都幾得意，又可以玩「尋找隱藏米奇」的遊戲，集齊米奇圖案就可以換份小禮物喇！仲有泳池都夠大好乾淨，淺水區好啱小朋友嘻水。晚上也可以欣賞迪士尼電影。節目係咪好豐富呢！如果你夠時間，仲可以去埋另一間酒店玩架！
第二日check out後我哋有繼續留喺酒店玩多陣，遊戲室同泳池係退房後都可以繼續享用架，咁就當然俾小朋友玩多次先走啦！過咗個開心又盡興的假期，yeah！
Facebook
Email
WhatsApp
Add a comment