之前兩兄妹喺碼頭見到人哋釣魚都會覺得好好玩，所以呢日就去咗流浮山嘅釣魚場，同佢哋享受釣魚樂。

嚟呢度釣魚，基本上咩都唔使帶，每位$120可借一枝魚杆，另加$20魚餌，冇時間限制，七歲以下小童免費入場。而釣到嘅魚可以買走，每種魚嘅價錢都唔同。

我哋喺呢度玩左幾個鐘，可惜都係食雞蛋冇收， 唯一一次有魚上釣，可惜俾佢走甩咗連魚鈎都斷埋。我哋懷疑唔知係咪因為啲冰鮮魚餌唔夠吸引，因為見隔離果台以蝦仔做魚餌不斷有收穫，下次都係試吓自己帶先得。

雖然食白果，不過亦係一個好有趣嘅體驗，可以磨練小朋友「耐性」，話俾佢哋聽即使釣唔到魚，亦要努力不斷嘗試，總會有成功的一天。

 

溫馨提示：

–場地都幾多蚊，記得預備蚊怕水。

-嗰度附近本身都有士多不過嗰日冇開，想醫肚嘅話釣魚場有餐蛋麵同汽水。

地址：元朗 流浮山 下白泥村 鴨仔坑

電話：2472 6134

網址：www.yl.hk/duck